兴宁情歌 （11）

兴宁情歌 （11）

（11）贪嫩正来缠

　　　　山歌爱唱妹爱连，
　　妹系青春郎少年，
　　竹笋拿来做豆架，
　　两家贪嫩正来缠。
　　
　　砍柴爱砍山布荆，
　　又贪好烧又贪轻，
　　连妹爱连年嫩女，
　　又贪伶俐又贪靓。
　　
　　风吹竹叶皮皮青，
　　妹爱连郎赶后生，
　　过多一年老一岁，
　　唔比春草年年青。
　　
　　十七十八正当时，
　　百花开早唔开迟，
　　竹笋出尾节节老，
　　今唔风流等几时。
　　
　　有心连妹莫来迟，
　　六月禾花会过时，
　　禾花谢落长江水，
　　哥系唔留打走哩。
　　
　　火烟相盖屋相连，
　　阿哥同妹上下年，
　　阿哥十八妹十七，
　　八七恰五月团圆。
　　
　　月子弯弯在半天，
　　船子弯弯在河边，
　　哥爱搭船赶大水，
　　妹爱连郎赶少年。
　　
　　食肉爱食夹心靓，
　　连妹爱连二十零，
　　日里知得郎辛苦，
　　夜里知得郎晓冷。
　　

作者：涛涛

编辑：天道